Ítalska lögreglan lagði nýlega hald á 150.000 lítra af lélegri sólblómaolíu, sem var búið að lita til að hún líktist jómfrúarolíu sem er mun dýrari. Olían átti að stórum hluta að fara á markað í Þýskalandi og á Ítalíu. 20 voru handteknir í tengslum við málið.

Þetta kemur fram í fréttatilkynningu frá Evrópulögreglunni Europol. Auk þess að enda á markaði í Þýskalandi og á Ítalíu fór hluti olíunnar á markað í Tékklandi, Hollandi, Spáni og Englandi.

Europol telur að glæpahópurinn hafi haft um átta milljónir evra á ári upp úr þessari svikastarfsemi.

Rannsókn málsins hófst þegar lögreglan fékk veður af að hópur glæpamanna keypti mikið magn sólblómaolíu til að „breyta“ í jómfrúarolíu. Það var gert með því að blanda ýmsum efnum og sojaolíu saman við sólblómaolíuna þannig að hún leit út fyrir að vera jómfrúarolía.