BBC skýrir frá þessu. Lögin verða nú send til Kay Ivey, ríkisstjóra úr repúblikanaflokknum, til staðfestingar. Hún hefur ekki skýrt frá afstöðu sinni til laganna en hún er talin vera harður andstæðingur fóstureyðinga.
Andstæðingar fóstureyðinga vona að nýju lögin muni verða til þess að Hæstiréttur Bandaríkjanna taki lög um fóstureyðingar til umfjöllunar í kjölfar nýju laganna og breyti dómi sínum frá 1973 sem heimilaði fóstureyðingar í Bandaríkjunum.
Landssamtök kvenna segja bannið „brjóta gegn stjórnarskránni“ og segja það vera „augljósa tilraun til að afla stuðnings við frambjóðendur, sem eru andvígir fóstureyðingum, í komandi kosningum“.
Talskonur ýmissa réttindasamtaka kvenna segja samþykkt laganna vera „svartan dag fyrir konur í Alabama og um allt land“.
Terri Collins, þingmaður repúblikana, segir að lögin kveði á um að barn í móðurkviði sé manneskja.
Bobby Singleton, þingmaður demókrata, sagði að lögin geri „lækna að afbrotamönnum“ og sé tilraun karla til „að segja konum hvað þær eiga að gera við líkama sína“.
Áður en umræður um lagafrumvarpið hófust á þinginu sagði Rodger Smitherman, þingmaður demókrata, að verið væri að segja 12 ára stúlku, sem er barnshafandi eftir nauðgun og sifjaspell, að hún eigi ekkert val.
Lögin ganga mun lengra en sambærileg lög í öðrum ríkjum Bandaríkjanna. Læknar eiga 10 ára fangelsi yfir höfði sér fyrir tilraun til fóstureyðingar og 99 ára fangelsi ef fóstureyðing tekst. Konu, sem lætur eyða fóstri, verður ekki gerð refsing.
Flutningsmenn frumvarpsins vonast til að tekist verði á um lögin fyrir dómstólum og að þau endi fyrir Hæstarétti. Lokamarkmið þeirra er að fá Hæstarétt til að taka það fyrir og snúa dómi sínum í máli Roe gegn Wade frá 1973 við en samkvæmt honum er réttur kvenna til fóstureyðinga talinn vera varinn af stjórnarskrá Bandaríkjanna. Í kjölfar útnefninga Donald Trump, forseta, á tveimur íhaldssömum dómurum í réttinn eru andstæðingar fóstureyðinga bjartsýnir á að hafa sigur fyrir Hæstarétti.