Lögreglumenn í Arizona í Bandaríkjunum stöðvuðu nýlega ökumann bifreiðar fyrir umferðarlagabrot. Það væri vart í frásögur færandi nema fyrir það sem var í framsæti bifreiðarinnar; látin eiginkona ökumannsins sem heitir Rodney Puckett og er sjötugur.
Arizona Republic fjallar um þetta óvenjulega mál en í fréttinni kemur fram að þau hjónin hafi verið á ferðalagi þegar eiginkonan, hin 74 ára Linda Puckett, lést.
Rodney sagði að Linda hefði gefið upp öndina á hótelherbergi í Texas stuttu áður. Segist hann ekki hafa séð sérstaka ástæðu til að hætta ferðalagi sínu, þess í stað hafi hann komið líkinu fyrir í framsætinu og spennt beltið, eins og venja er. Svo hafi hann haldið ferðalaginu áfram.
Rodney og Linda gengu í hjónaband árið 2011 og segja bandarískir fjölmiðlar að þau hafi staðið í skilnaði um það leyti sem Linda lést. Lögregla hefur ekki gefið neitt út um það hvort eitthvað saknæmt hafi átt sér stað; krufning mun væntanlega skera úr um það.
Rodney á þó í það minnsta yfir höfði sér ákæru fyrir að tilkynna ekki um andlát eiginkonu sinnar.