Þann 29. apríl síðastliðinn var Bandaríkjamaðurinn Jamie Frierson dæmdur fyrir bankarán. Jamie hafði setið inn vegna nokkurra rána sem hann framdi árið 2017 en þegar kom að því að kveða upp dóm ákvað dómari að sýna honum miskunn.
Jamie, sem er 49 ára, útskýrði fyrir dómaranum að hann væri með ristilkrabbamein og væri raunar dauðvona. Hann vildi gjarnan nýta þann tíma sem hann ætti eftir með fjölskyldu sinni. Dómari varð við þessari beiðni og mat það svo að Jamie væri búinn að sitja inni nógu lengi, eða rúmt ár, og mætti fara.
Þessi sami dómari sér kannski eftir því núna því aðeins níu dögum síðar var Jamie aftur handtekinn vegna bankaráns. Þann 8. maí síðastliðinn var hann gómaður við útibú Apple Bank í Bronx í New York. Hann hafði gengið inn í útibúið, rétt gjaldkera miða sem á stóð að um rán væri að ræða og komst undan með 200 dollara.
„Augljóslega þá lærði hann ekki sína lexíu,“ segir William F. Sweeney, fulltrúi FBI, í frét New York Daily News.
Jamie átti yfir höfði sér allt að sautján ára fangelsi vegna ránanna árið 2017 . Óvíst er hvað tekur við hjá Jamie en ekki þykir útilokað að hann verði í fangelsi það sem eftir er.