Í beyglunni voru valmúafræ sem orsökuðu að í þvagprufu Elizabeth fundust ummerki um ópíóíða. Í kjölfar málsins hefur Elizabeth komið fram í fjölmiðlum til að vara fólk við þessu.
„Ég vil bara að allir viti að þetta getur gerst. Ég vil ekki að þetta komi fyrir aðra.“
Sagði hún í samtali við ABC um málið.
„Það var tekin þvagprufa og ég fékk að vita að hún hefði gefið jákvæða svörun við ópíóíði. Ég hringdi í manninn minn og spurði: „Hvernig getur staðið á þessu?“ Ég nota ekki eiturlyf.“
Eiginmaðurinn spurið hana hvað hún hefði borðað fyrir fæðinguna.
„Ég sagði honum að ég hefði borðað beyglu og smábrauð. Það var það eina. Hann sagði að þetta hlyti að tengjast beyglunni.“
Sagði hún.
Í beyglunni var mikið af valmúafræjum en Elizabeth vissi ekki að þau geta gefið jákvæða svörun við ópíóíði.
Blóðprufur úr barni hennar gáfu enga svörun við ópíóíði en samt sem áður var barnaverndaryfirvöldum tilkynnt um málið. Þegar Elizabeth var útskrifuð tæpum sólarhring eftir fæðinguna varð hún að skilja barnið eftir á sjúkrahúsinu.
Nánari rannsóknir voru gerðar og leiddu þær í ljós að það voru valmúafræin sem höfðu valdið því að þvagsýnið gaf jákvæða svörun við ópíóíði og fékk Elizabeth barnið aftur.
„Þetta var hræðilegt. Mér leið eins og ég væri hræðileg móðir sem yfirgaf barnið. Ég vil bara að allir viti að þetta getur gerst. Þetta er hræðilegt og ég vil ekki að þetta komi fyrir aðra.“
