Starfsfólki félagsmáladeildar Södertälje í Svíþjóð svelgdist á kaffinu sínu nýlega þegar maður kom akandi þangað á rauðri Ferrari bifreið til að sækja um fjárhagsaðstoð frá sveitarfélaginu. Hann lagði bifreiðinni fyrir fram skrifstofuna og gekk inn og sótti um fjárhagsaðstoð og ók síðan á brott á bifreiðinni sem er ekki ein af þeim ódýrari á markaðnum.

Sænskir fjölmiðlar skýra frá þessu en málið hefur vakið mikla athygli á samfélagsmiðlum í Svíþjóð.

Nánari skoðun á málinu leiddi í ljós að maðurinn er ekki skráður eigandi Ferrari bifreiðarinnar en hafði afnot af henni. Anna Flink, yfirmaður félagsmáladeildarinnar, telur að bíllinn sé í eigu svokallaðs „bilmålvakt“ en ekki er hægt að sanna það.

„Bilmålvakt“ er orð sem er notað í Svíþjóð yfir fólk sem fellst á að láta skrá sig sem eigendur að bíl eða bílum þrátt fyrir að eiga þá ekki. Með því að gera þetta svona getur eigandi bílsins komist hjá því að greiða skatta og gjöld af bílnum því það er skráður eigandi, „bilmålvakten“ sem ber ábyrgð á greiðslu þeirra. Sá greiðir þessi gjöld ekki og þar með verður ríkið af háum fjárhæðum.

Fyrir þremur árum sýndu opinberar tölur að bíleigendur skulduðu ríkinu sem svarar til tæplega 25 milljarða íslenskra króna í skatt og önnur gjöld.