„Mjög mikilvægt, hjálpið mér að velja: Líf eða dauði?“ Þessari spurningu varpaði 16 ára malasísk stúlka fram á samfélagsmiðlinum Instagram á mánudaginn til fylgjenda sinna. Margir greiddu atkvæði og meirihlutinn sagði dauði og það hafði alvarlegar afleiðingar. Nokkrum klukkustundum eftir að stúlkan birti færsluna hoppaði hún fram af þaki byggingar í Sarawak í Malasíu.

Lögreglan segir að þegar hún gerði það hafi 69 prósent, þeirra sem greiddu atkvæði, merkt við „dauða“. Þegar atkvæðagreiðslunni lauk 24 klukkustundum síðar var niðurstaðan allt önnur, þá höfðu 88 prósent fylgjenda stúlkunnar merkt við „líf“. En það var um seinan. Stúlkan hafði tekið ákvörðun um að velja dauðann hefur Sky eftir Aidil Bolhassan, lögreglustjóra. Hann telur að flestum fylgjenda hennar hafi brugðið svo við að heyra um hinar skelfilegu afleiðingar atkvæðagreiðslunnar að þeir hafi farið inn á Instagram og kosið „lífið“. Yfirvöld hafa nú krafist frekari rannsóknar á málinu. Vitað er að stúlkan hafði glímt við þunglyndi.

Því miður er þetta mál ekki einsdæmi. Á heimsvísu eru mörg dæmi um ungar stúlkur og drengi sem hafa valið að taka eigið líf eftir að hafa fengið innblástur þar um á netinu eða verið hvött til þess á samfélagsmiðlum eða öðrum netmiðlum.