Þann 10. maí síðastliðinn fékk lögreglan í Charles sýslu í Maryland í Bandaríkjunum óvænt símtal frá 4 ára dreng og er óhætt að segja að erindi hans hafi verið brýnt. Móðir hans hafði skilið hann eftir í bíl utan við verslunarmiðstöð. Allir gluggar bílsins voru lokaðir og hitinn utanhúss var 26 gráður þennan daginn. Bíllinn stóð í sólinni svo hann var fljótur að hitna.
En drengurinn var ekki einn í bílnum því samkvæmt frétt Fox5 voru 6 börn til viðbótar í honum, öll á aldrinum 2 til 4 ára. Drengurinn, sem hringdi í lögregluna, var elsta barnið í bílnum.
Lögreglan segir að móðir drengsins eigi hann og eitt barn til viðbótar af þeim sem voru í bílnum. Hún hafði fyrirskipað þeim að vera í bílnum á meðan hún færi inn að versla en hafði ekki látið sér detta í hug að þetta gæti stefnt lífi barnanna í hættu.
Lögreglan gat staðsett bílinn í gegnum GPS í síma drengsins og var fljót á vettvang. Í bílnum var aðeins einn barnabílstóll en samkvæmt lögum í Maryland eiga öll börn undir 8 ára aldri að vera í bílstól eða þar til gerðum öryggisbúnaði.
WJLA hefur eftir talsmanni lögreglunnar að börnin hafi verið „hrædd og sveitt“ en hafi ekki þurft á læknishjálp að halda. Talið er að konan hafi verið fjarverandi í 20 mínútur hið minnsta. Hún hefur verið kærð fyrir að stefna lífi barnanna í hættu og á ákæru yfir höfði sér.
