Hinn tuttugu og fjögurra ára Breti, Isaac Roblett, hefur væntanlega ekki grunað að meðfylgjandi smáskilaboð sem hann sendi til kærustu sinnar myndu gera það að verkum að honum yrði stungið í fangelsi, vísað úr landi og bannað að koma aftur til Bandaríkjanna.
Roblett lenti í ótrúlegum ógöngum á dögunum þegar hann hugðist heimsækja kærustu sína sem búsett er í Chicago.
Það var þann 24. apríl síðastliðinn að Roblett gekk inn í flugvélina til Bandaríkjanna. Hann hafði sótt um svokallað ESTA-leyfi, en það gerir fólki kleift að vera í Bandaríkjunum í allt að þrjá mánuði.
Þeir sem hafa komið til Bandaríkjanna kannast eflaust flestir við að fulltrúar útlendingaeftirlitsins eiga það til að spyrja ferðamenn um tilgang ferðarinnar til Bandaríkjanna. Roblett ræddi við einn slíkan sem vildi fá að skoða símann hans og það var þá sem starfsmaðurinn rak augun í umrædd smáskilaboð til kærustunnar, Camilu Iglesia.
Í smáskilaboðunum talar hann um að „flytja“ til hennar og það var nóg til þess að Roblett var handtekinn. Upp var kominn grunur um að Roblett ætlaði sér að dvelja í Bandaríkjunum með ólögmætum hætti. Honum var skutlað í fangaklefa þar sem hann dvaldi í sólarhring áður en hann var sendur aftur upp í flugvél sem flutti hann heim til Bretlands. Svo fékk hann þau skilaboð að hann væri ekki velkominn aftur til Bandaríkjanna.
Parið kynntist þegar Camila var skiptinemi í Bretlandi og höfðu þau ferðast um allan heim saman og Roblett áður heimsótt hana til Bandaríkjanna.
Þó svo að Roblett hafi nú verið meinað að koma aftur til Bandaríkjanna ætlar parið að reyna að halda sambandinu gangandi. Það gæti þó reynst erfitt enda er Camila í leiklistarnámi í Chicago og þá býr fjölskylda hennar öll í Bandaríkjunum.