Lögregluyfirvöld í Dallas í Bandaríkjunum skoða nú hvort tengsl séu á milli tveggja morða sem framin voru á tveimur transkonum á dögunum. Þá var ráðist á þriðju konuna í apríl síðastliðnum og henni veittir talsverðir áverkar með hnífi.
Málið hefur eðli málsins samkvæmt vakið talsverðan óhug í Bandaríkjunum.
Vincent Weddington, fulltrúi lögreglunnar í Dallas, sagði á blaðamannafundi í gær að ákveðin líkindi væru með þessum þremur málum og því væri ekki hægt að útiloka hugsanleg tengsl. Enginn hefur þó enn sem komið er verið handtekinn.
Tuttugu og þriggja ára transkona, Muhlaysia Booker, var skotin til bana í Dallas á laugardag. Þá var aðeins liðinn einn mánuður frá því að myndband náðist af því þegar ráðist var á hana og henni veittir miklir líkamlegir áverkar. Fyrsta árásin var framin í október síðastliðinum en líkt og í tilfelli Booker var fórnarlambið skotið til bana.