Eftir að Game of Thrones lauk göngu sinni er ekki loku fyrir það skotið að aðdáendur þáttanna séu farnir að leita að nýju efni til að sökkva tönnunum í.
Nýlega hófu göngu sína þættirnir Chernobyl en eins og nafnið gefur til kynna segja þeir frá kjarnorkuslysinu í Chernobyl árið 1986. Um er að ræða versta kjarnorkuslys sögunnar; aðdragandann, eftirmálin og þau mistök sem gerð voru eftir slysið.
Þættirnir eru framleiddir af HBO og er óhætt að segja að þeir hafi fallið í kramið hjá áhorfendum. Nú þegar þættirnir hafa verið sýndir eru þeir með einkunnina 9,7 á IMDB.com en til samanburðar er Game of Thrones með einkunnina 9,4. Aðrir þættir sem taldir eru með þeim bestu í sögunni, Breaking Bad, eru með einkunnina 9,5.
Þá eru þættirnir með einkunnina 96 á Rotten Tomatoes en Game of Thrones með einkunnina 90. Breaking Bad eru með einkunnina 96 líkt og Chernobyl.
Þess má geta að Ísland á sinn fulltrúa í Chernobyl en Baltaser Breki Samper fer með lítið hlutverk í þáttunum.
Hér að neðan má sjá sýnishorn úr þáttunum:
