Yfirvöld í Alabama í Bandaríkjunum hafa samþykkt umdeilt lagafrumvarp þess efnis að dæmdir barnaníðingar gangist undir lyfjameðferð, sem hefur það markmið að vana þá eða gelda, áður en þeir fara úr fangelsi. Frumvarpið bíður aðeins undirskriftar ríkisstjórans, Kay Ivey.

Frumvarpið tekur til þeirra sem brotið hafa gegn börnum sem eru þrettán ára eða yngri og verður lyfjameðferðin skilyrði fyrir því að fá reynslulausn. Brotamenn sem gangast undir meðferðina mega ekki vera yngri en 21 árs samkvæmt sama frumvarpi.

Í frumvarpinu er kveðið á um að þeir sem gangist undir meðferðina fái meðal annars hormónið medroxýprógesterón sem er kvenhormón. Það dregur úr, bælir eða stöðvar framleiðslu á testósteróni í líkamanum, að því er fram kemur í frétt Newsweek. Hafa ber í huga að hér er aðeins átt við vönun með lyfjameðferð en ekki með skurðaðgerð.

Vönun með lyfjameðferð var fyrst leyfð í Kaliforníu árið 1996 og notuð í sama tilgangi og nú stendur til að gera í Alabama. Önnur ríki sem hafa leyft þetta eru til að mynda Flórída og Texas, þó óvíst sé hversu oft meðferðinni sé beitt, að því er segir í frétt Newsweek.

Sitt sýnist hverjum um frumvarpið en einn þeirra sem er mótfallinn því er lögfræðingurinn Raymond Johnson. Hann segist ekki efast um að látið verði reyna á lögmæti laganna gagnvart ákvæðum bandarísku stjórnarskrárinnar. Í henni er meðal annars kveðið á um bann við ómannúðlegum eða óvenjulegum refsingum. Þarna sé um að ræða einstaklinga sem lokið hafa – eða eru við það að ljúka – afplánun sinna dóma.

Steve Hurst, þingmaður Repúblikana og sá sem lagði frumvarpið fram, segir aftur á móti að refsingin eigi að hæfa glæpnum. Um sé að ræða einstaklinga sem hafa brotið gegn börnum og börnin beri ör af brotunum það sem eftir er. Óvíst er hvort Ivey skrifi undir frumvarpið en geri hún það tekur það gildi þremur mánuðum eftir undirskrift.