Tollverðir á Gardemoen flugvellinum í Osló trúðu ekki eigin augum í vikunni þegar þeir opnuðu ferðatöskur tveggja ungra manna sem komu með flugi frá Afríku. Þegar töskurnar voru opnaðar flæddu tramadol verkjatöflur út úr þeim, svo vel var troðið í þær. Í heildina voru 184.000 töflur í töskunum fjórum.

Það sem af er ári hafa norskir tollverðir lagt hald á rúmlega hálfa milljón tafla af þessari tegund. Tramadol er verkjalyf sem virkar á miðtaugakerfið. Virkni þess líkist virkni morfíns og ekki má nota það í langan tíma.

Áhugi tollvarða beindist að ungu mönnunum þegar þeir stóðu og biðu eftir töskunum sínum í komusal flugvallarins. Þegar rætt var við þá bar frásögn þeirra ekki saman en á endanum voru þeir báðir færðir á brott í handjárnum.

Tramadol er löglegt í Noregi ef læknar ávísa lyfinu en það er bannað í öðrum Evrópuríkjum og flokkað sem fíkniefni.