Í tengslum við viðskiptastríð Bandaríkjanna og Kína, sem er háð með tollum á vörur frá löndunum, hafa framleiðendur í þeim þurft að leita nýrra birgja. Þetta hefur komið sér vel fyrir Víetnam en bæði kínversk og bandarísk fyrirtæki hafa leitað þangað í miklum mæli til að kaupa þær vörur sem þau þurfa.

Verg þjóðarframleiðsla landsins hefur aukist um 7,9 prósent af þessum sökum segir í frétt CNBC. En fleiri ríki hafa einnig notið góðs af viðskiptastríðinu, þar á meðal Taívan, Chile, Malasía, Argentína og Hong Kong. Útflytjendur í Víetnam og Taívan hafa aðallega selt vörur til Bandaríkjanna en í hinum ríkjunum beinist salan aðallega til Kína.

Meðal þess sem bandarísk fyrirtæki hafa verið á höttunum eftir eru aukahlutir fyrir farsíma, varahlutir í skrifstofubúnað, tölvubúnaður og húsgögn. Kínverjar hafa hins vegar mest verið á höttunum eftir sojabaunum, flugvélum, hveiti og ullarvörum.