42 milljónir fyrir 23 fermetra tveggja hæða íbúð er ansi gott fermetraverð auk þess sem það eru nú ekki margir fermetrar á hvorri hæð. Privatmeglerne í Osló eru nú með þessa íbúð til sölu en ásett verð hennar er um 3 milljónir norskra króna en það svarar til um 42 milljóna íslenskra króna.

Íbúðin er í húsi sem var áður hesthús en var tekið í gegn og breytt í íbúðarhúsnæði á þessu ári. Það er óhætt að segja að hönnuðum hennar hafi tekist að finna leiðir til að nýta hvern fermetra til fulls og eiginlega rúmlega það. TV2 skýrir frá þessu.

Rúmið er undir stiganum og það er hægt að draga það út og ýta aftur inn þegar það er ekki í notkun. Þannig losnar um gólfpláss. Þá nýtist rúmið einnig sem sófi þegar búið er að ýta því inn. Undir því eru síðan skúffur.