Grunur leikur á að dauði eins árs barns í bænum Askøy í Hörðalandi í Noregi megi rekja til mengunar í vatnsbóli bæjarins. Átján bæjarbúar hafa verið lagðir inn á sjúkrahús vegna gruns um sýkingu, þar af eru átta börn.
Þá var greint frá því eftir hádegi í dag að fleiri einstaklingar bæru einkenni sýkingar, þar á meðal tugir barna í barnaskólanum í Askøy. Niðurstöður rannsóknar í gær leiddu í ljós að E-coli-baktería fannst í drykkjarbóli við bæinn en óvíst er hvort hún sé sökudólgurinn.
Í frétt VG í Noregi kemur fram að rannsókn á málinu standi yfir og hvort dauði barnsins megi rekja til mengunarinnar í vatnsbólinu. Barnið, drengur, lést á sjúkrahúsi á miðvikudag.
„Við munum rannsaka þetta en að svo stöddu þá getum við ekki fullyrt að tengsl séu á milli,“ segir Thomas Hetland, sérfræðingur í smitsjúkdómavörnum, í samtali við VG.
Bengt Åge Borge, yfirmaður á heilbrigðissviði bæjarins, segir ólíklegt að E-coli-bakterían sem slík hafi valdið veikindunum. Líftími hennar í vatni sé mjög stuttur. Mögulega sé eitthvað annað sem hafi valdið veikindunum. Hann ítrekar þó að þetta séu aðeins getgátur enda málið enn í rannsókn.
Eitt helsta einkenni E-coli-sýkingar er niðurgangur, kviðverkir og uppköst. Sjúklingar geta fengið hita en einkennin ganga vanalega yfir á 5 til 7 dögum.