Þau höfðu þekkst í um fimm mánuði þegar Emma bjargaði lífi hans. Þegar hún faðmaði hann dag einn fann hún klump í baki hans. Hún linnti ekki látum fyrr en hann fór til heimilislæknisins síns í skoðun. Í umfjöllun Mirror er haft eftir James að hann hafi talið þetta vera blöðru en hafi þó verið meðvitaður um að þetta gæti verið eitthvað alvarlegra og það var raunin.
Hann greindist með Ewing‘s Sarcoma sem er sjaldgæf tegund krabbameins. James gekkst undir 13 mánaða langa meðferð við krabbameininu. Hluta hennar þurfti hann að gangast undir í Bandaríkjunum en hann býr á Englandi. Hann hefur nú verið útskrifaður og er sagður laus við krabbameinið.
„Ég hafði bara þekkt James í fimm mánuði þegar ég fann æxlið. Vinir mínir höfðu skráð mig á Tinder í gríni. James er alltaf að segja mér að ég hafi bjargað lífi hans. Ef það er rétt það bjargaði ég ekki bara honum heldur framtíð okkar beggja.“
Sagði Emma.
James var einkennalaus þegar Emma fann æxlið í nóvember 2017. Hann lifði sínu lífi á eðlilegan hátt án þess að vita að krabbameinið hafði grafið um sig í líkama hans. Ewing‘s Sarcoma er sjaldgæf tegund krabbameins sem leggst á bein eða mjúkvef líkamans. Það átti upptök sín í rifbeini. Það er aðallega ungt fólk og unglingar sem greinist með þessa tegund krabbameins.