Átján ára stúlka, Karmen Curley að nafni, skellti sér í frí til Los Angeles á dögunum. Það væri vart í frásögur færandi nema fyrir þær sakir að Karmen er nú á gjörgæsludeild og situr uppi með átján milljóna króna reikning eftir slys sem hún lenti í á dögunum.
Karmen er frá Norður-Írlandi og var hún að heimsækja systur sína sem er búsett í Los Angeles. Dag einn fyrir skemmstu skellti hún sér á vespu en ekki vildi betur til en svo að hún missti stjórn á vespunni þegar hún ók ofan í holu á veginum. Karmen hlaut alvarlega höfuðáverka í slysinu.
Nú hefur systir hennar, Sian, hrint af stað söfnun til að freista þess að safna upp á sjúkrahúsreikninginn. Reikningurinn er til kominn vegna þess að Karmen var ekki búin að verða sér út um sérstaka tryggingu áður en hún hélt til Bandaríkjanna.
Karmen hefur dvalið á UCLA-sjúkrahúsinu að undanförnum og kostar það skildinginn; eða 15 þúsund Bandaríkjadali dagurinn, upphæð sem nemur 1,8 milljónum króna.
Móðir þeirra systra féll frá á síðasta ári og er bakland þeirra ekki stórt. „Við erum í raun bara tvær,“ segir Sian við breska blaðið Mirror sem greindi frá söfnuninni. „Ef það er eitthvað sem ég hef lært af þessari reynslu er mikilvægi þess að hafa góða ferðatryggingu,“ bætir hún við.