Lögreglan í Indiana bjargaði konu eftir að þrjú dádýr höfðu ruðst inn um glugga á íbúð hennar og fest hana þar með í íbúðinni með skelfdum dýrunum. Lögreglan segir að konan, sem er 74 ára, hafi verið í íbúð sinni á þriðjudagskvöld þegar dádýrin ruddust inn um svefnherbergisgluggann. Konan hringdi á neyðarlínuna og fundu lögregluþjónar konuna fasta á stofusófanum með göngugrindina á gólfinu á meðan dádýrin hoppuðu um herbergið.

Lögreglan náði svo að handsama eitt dádýranna og koma því út, hin tvö enduðu inni á baðherbergi þar sem þau voru svæfð og síðar sleppt. Lögreglan segir að konan hafi verið ómeidd og hafi verið ótrúlega róleg miðað við aðstæður en töluverðar skemmdir urðu á íbúðinni af völdum dádýranna.