Lögreglumenn telja að „raðmorðingi og nauðgari“ gangi laus í Detroit eftir að rotnandi lík þriðju konunnar fannst í yfirgefnu húsi á miðvikudag. Lögreglustjórinn, James Craig, segir að morðin, sem hófust í mars, virðist tengjast kynlífsiðnaðinum. Tvær kvennanna voru á sextugsaldri.

„Við teljum að hér sé raðmorðingi og nauðgari að verki og viljum vara alla þá sem vinna í kynlífsiðaðinum við, sérstaklega þær sem vinna í yfirgefnum húsum“ sagði Craig.

Hann óskaði eftir upplýsingum frá almenningi, sérstaklega þeim sem selja kynlíf, en tók einnig fram að lögreglan vildi ekki skapa skelfingu í borginni. Fyrsta fórnarlambið fannst hinn 19. mars, Craig sagði að upphaflega hefði verið talið að hún hafi látist af of stórum skammti fíkniefna en það hafi síðan breyst. Annað morðið átti sér stað í lok maí. „Við teljum að öll þessi mál séu tengd, eins og er er enginn grunaður,“ sagði lögrglustjórinn.