Talið er að fyrirtæki í Frakklandi hendi vörum fyrir sem nemur rúmum hundrað milljörðum króna. Þetta eru að stærstum hluta föt sem enda á ruslahaugunum. Nú ætla Frakkar að spyrna við fótum og banna sóun af þessu tagi, að því er fram kemur í umfjöllun New York Times.
Édouard Philippe, forsætisráðherra Frakklands, segir að þetta gangi gegn öllu því sem Frakkar vilja standa fyrir. Verði Philippe að ósk sinni verður það refsivert að fleygja nothæfum vörum. Er hér átt við aðrar vörur en matvörur, til dæmis föt, raftæki og snyrtivörur. Frumvarpið kemur til meðferðar franska þingsins í júlímánuði.
Í frétt New York Times kemur fram að það verði skylda að endurnota, endurvinna eða gefa vörur sem ella hefðu endað á haugunum.
Fyrirtæki hafa talið hagsmunum sínum betur borgið að henda vörunum frekar en að selja þær á lægra verði. Hefur þetta verið stundað til að skapa pláss fyrir nýjar vörur í vöruhúsum fyrirtækja.
Nokkur fyrirtæki hafa verið gagnrýnd harðlega að undanförnu fyrir þessa iðju, til að mynda Amazon og lúxusvöruframleiðandinn Burberry. Í kjölfar gagnrýninnar tilkynnti Burberry að fyrirtækið myndi láta af þeirri iðju að brenna óseldan fatnað sem metinn er á hundruð milljóna króna.