Fyrir nokkrum mánuðum var maður að nafni Billy Wayne Coble tekinn af lífi í Texas með banvænni sprautu fyrir glæpi sem hann framdi fyrir 30 árum. Billy Wayne, sem var sjötugur, var elsti maðurinn sem tekinn hefur verið af lífi síðan Texas-fylki tók að nýju upp dauðarefsingu árið 1982. Billy Wayne hafði setið í fangelsi í nær 30 ár áður en hann var tekinn af lífi.
Billy Wayne myrti tengdaforeldra sína og bróður eiginkonu sinnar með skotvopni árið 1989. Orsaka glæpsins var að leita í deilum við eiginkonuna sem var farin frá honum. Hann hafði setið um fjölskylduna og eiginkonuna í nokkrar vikur áður en hann framdi hina hryllilegu glæpi. Billy Wayne rændi líka eiginkonu sinni, Karen Vicha, handjárnaði hana og ók með hana út úr byggð. Það vildi henni til láns að Billy Wayne lenti í árekstri á leiðinni og var handtekinn áður en hann myrti hana.
Næstkomandi fimmtudagskvöld birtir breska sjónvarpsstöðin ITV heimildarmynd með viðtölum fjölmiðlakonunnar Susanne Reid við nokkra fanga á dauðadeild, þar á meðal Billy Wayne Coble. Þegar hún spurði hann hvort hann vildi biðjast afsökunar vegna glæpa sinna færðist hann undan því og sagði að þeir skiptu í raun ekki máli og það væri svo langt síðan. Hann hefur aldrei sýnt iðrun og saksóknari einn lýsti honum einu sinni þannig að hjarta hans væri fullt af sporðdrekum.
Susanna Reid spurði hann hvort hann óttaðist dauðann og svaraði hann því meðal annars til að allir muni einhvern tíma deyja. Hann sagði líka: „Allir segja að þetta sé svo hræðilegur dauðdagi en geturðu bent mér á einhvern góðan dauðdaga?“
Nánar er fjallað um málið á Metro og víðar.