Lífið virtist leika við Elenor Proctor, 36 ára gamlan kennara frá Wakefield í Vestur-Yorkshire í Bretlandi. Hún var búin að mennta sig í kennarafræðum og opna sitt eigið fyrirtæki þar sem hún sérhæfði sig í að undirbúa starfsmenn grunnskóla í Bretlandi fyrir eftirlitsskoðanir yfirvalda. Þá átti hún eiginmann og tvær fallegar dætur. Hún missti hins vegar allt þegar hún skildi í fyrra.

Elenor byrjaði með dæmda þjófinum og heróínfíklinum Patrick Nicholson eftir sambandsslitin og byrjaði að ræna og rupla með honum. Hún var dæmd í fjögurra ára fangelsi í síðustu viku í Manchester og hafði dómarinn Richard Mansell á orði að saga Elenor ætti að vera öðrum víti til varnaðar.

„Sagan þín er gott dæmi um þá meinsemd sem fíkniefni eru, sérstaklega heróín og krakk,“ sagði hann samkvæmt frétt á vef Daily Mail. „Fyrir þig er þetta stórbrotið, en á margan hátt óumflýjanlegt, fall úr lífinu sem þú lifðir einu sinni, þar sem þú varst í þokkalegri vinnu og áttir fjölskyldu, yfir í að vera heimilislaus á götunni og átt nú yfir höfði þér fangelsisdóm.“

Elenor gekkst við fjórum ákærum um þjófnað og tveimur um svik. Hún var auðmjúk í réttarsalnum.

„Þetta er ekki ég. Ég er ekki innbrotsþjófur,“ sagði hún. „Ég missti allt á einni viku. Ég missti bara alla stjórn.“

Elenor og fyrrnefndur Patrick sigtuðu út aldraða karlmenn og konur í Eccles, nálægt Manchester, sem fórnarlömb sín. Rændu þau og rupluðu í mars síðastliðnum með þeim afleiðingum að þau náðust loksins. Patrick gekkst einnig við sex ákærum og fékk átta ára fangelsisdóm.