137 árum eftir að hornsteinninn var lagður að hinni frægu kirkju La Sagrada Familia í Barcelona á Spáni hefur byggingaleyfi verið gefið út. Kirkjan er heimsfræg fyrir að vera enn í smíðum en það var Antoni Gaudí sem teiknaði hana.

Kirkjan er talin vera meistaraverk hans og hún laðar ferðamenn að í stórum stíl ár hvert. Vonast er til að það takist að ljúka byggingu hennar 2026 en þá verða 100 ár liðin frá andláti Gaudí.

4,5 milljónir manna heimsækja kirkjuna árlega og 20 milljónir til viðbótar heimsækja svæðið næst henni til að kíkja á hana úr fjarlægð.

Bygging hennar hófst 1882 en ekki var sótt um byggingaleyfi fyrr en 1885. Yfirvöld í Barcelona segja að svo virðist sem það hafi aldrei verið veitt.

Sjóðurinn, sem stendur á bak við byggingu kirkjunnar, hefur náð samkomulagi við borgaryfirvöld um að greiða 4,6 milljónir evra í bætur fyrir að hafa ekki verið með byggingaleyfi.