Á föstudaginn var flugvél frá pakistanska flugfélaginu Pakistan International Airlines á flugvellinum í Manchester á Englandi og var verið að undirbúa brottför. Farþegar voru komnir um borð og allt gekk sinn vanagang þar til einn farþeginn þurfti nauðsynlega að fara á klósettið.

Honum tókst þó að ruglast vel í ríminu og í stað þess að fara á klósettið opnaði hann neyðarútgang. CNN skýrir frá þessu. Neyðarrennibraut blés út þegar neyðarútgangurinn var opnaður.

Þetta gerði að verkum að brottför flugvélarinnar seinkaði um sjö klukkustundir.

Þegar flugvél er á lofti er ekki hægt að opna neyðarútganga hennar vegna muns á loftþrýstingi inni í henni og utan. Neyðarútgangarnir opnast inn og það geta þeir ekki þegar loftþrýstingurinn er miklu hærri inni í flugvélinni en utan hennar.