Á fimmtudagskvöldið heyrðu þrjár unglingsstúlkur, systur, undarleg hljóð og öskur berast frá skógi nærri heimili þeirra í Forsyth County í Georgíuríki í Bandaríkjunum.

„Við sóttum vasaljósin okkar og gengum um skóginn og hugsuðum allar með okkur: „Þetta hljómar ekki eins og dýr“.

Sagði ein þeirra, Kayla Ragatz, í samtali við WSB TV.

Systurnar sóttu síðan föður sinn, Alan Ragatz, og sögðu honum frá þessum dularfullu hljóðum og öskrum en stúlkurnar töldu þetta geta borist frá barni. Hann kom þeim til aðstoðar við leitina og fann nýfædda stúlku í plastpoka ekki fjarri heimili hans.

Alan segist sjálfur hafa verið fullur efasemda í upphafi og hafi talið að hljóðin bærust frá þvottabirni eða dádýri. En þegar hann heyrði þau sjálfur hafi tvær grímur runnið á hann. Ásamt dætrunum náði hann að staðsetja hljóðin í laufhrúgu. Þegar þau nálguðust hrúguna urðu þau sannfærð um að það væri barn sem öskraði.

„Við beygðum okkur niður og fundum lítið barn í plastpoka. Við hringdum síðan í neyðarlínuna. Litla stúlkan var á lífi. Hún grét og öskraði. Það vissi á gott.“

Sagði Alan.

Talið er að stúlkan hafi verið nokkurra klukkustunda gömul þegar hún fannst en hluti naflastrengsins var enn fastur við hana.

Lögreglan reynir nú að hafa uppi á móður hennar og hefur óskað eftir upplýsingum frá almenningi.

Stúlkan var strax flutt á sjúkrahús og hefur hún það gott. Hún hefur hlotið nafnið India.