Lögreglan í Dóminíska lýðveldinu hefur handtekið sex einstaklinga sem grunaðir eru um að tengjast tilræðinu við David Ortiz, fyrrverandi leikmann bandaríska hafnaboltaliðsins Boston Red Sox. Ortiz, sem er 43 ára, er í hópi bestu hafnaboltaleikmanna síðustu ára en hann hætti árið 2016.

Ortiz, sem á ættir að rekja til Dóminíska lýðveldisins, var staddur á bar í Santo Domingo á sunnudag þegar byssumaður skaut á hann. Eitt skotið hæfði Ortiz í bakið og var hann fluttur alvarlega slasaður á sjúkrahús þar sem hann gekkst undir aðgerð.  Ortiz meiddist nokkuð illa; læknar fjarlægðu meðal annars gallblöðruna og hluta af ristlinum. Hann var fluttur með sjúkraflugi til Bandaríkjanna þar sem hann dvelur á sjúkrahúsi, en batahorfur eru taldar góðar.

Lögreglan í Santo Domingo segir að sá sem grunaður er um að hafa skotið sé hinn 25 ára gamli Rolfi Ferreira Cruz. Að sögn lögreglu fengu mennirnir 400 þúsund dóminíska pesóa fyrir að ráða Ortiz af dögum, en upphæðin jafngildir um einni milljón króna. Ekki liggur fyrir hver skipulagði tilræðið en Rolfi þessi bjó um tíma í Bandaríkjunum þar sem hann komst nokkrum sinnum í kast við lögin.