Eitt óhugnanlegasta sakamál sem komið hefur upp í Suður-Karólínu í Bandaríkjunum hefur verið leitt til lykta fyrir dómstólum. Timothy Jones Jr., sem ákærður var fyrir að drepa fimm börn sín, var dæmdur til dauða í gær.
Kviðdómur mælti með dauðarefsingu eftir að hafa setið réttarhöldin. Tók það kviðdómendur aðeins tvær klukkustundir að komast að þessari niðurstöðu.
Timothy sýndi engin viðbrögð þegar dómurinn var kveðinn upp en hann átti annað hvort yfir höfði sér dauðarefsingu eða lífstíðarfangelsi.
Börn Timothy voru á aldrinum eins til átta ára en morðin framdi hann á heimili fjölskyldunnar í Lexington í ágúst 2014. Notaði hann hendurnar til að fremja voðaverkin. Hann kom líkunum svo fyrir í ruslapokum og setti í bíl sinn. Hann losaði sig svo við líkin við fáfarinn sveitaveg í Alabama níu dögum síðar.
Það vakti athygli í vikunni þegar fyrrverandi kona Jones og móðir barnanna bað kviðdómendur um að þyrma lífi hans. Sagðist hún almennt vera á móti dauðarefsingum en hún myndi þó virða þá ákvörðun sem kviðdómurinn tæki.