Að kvöldi 12. nóvember 1976 hurfu Renee MacRae og þriggja ára sonur hennar, Andrew. Síðast sást til þeirra aka á brott frá Inverness í  Skotlandi í BMW bifreið. Áður hafði Renee, sem var 36 ára, skilið eldri son sinn eftir hjá fyrrum eiginmanni sínum. Hún ætlaði til Perth en þar bjó ástmaður hennar. Hún skilaði sér aldrei á leiðarenda.

BBC skýrir frá þessu. Seint um kvöldið fannst bíllinn brunnin tæplega 20 km frá Inverness. En engin ummerki voru eftir Renee eða Andrew. Í farangursrýminu fannst blóð.

Lögreglan hefur reynt að leysa málið öll þessi ár en án árangurs. En nú gæti verið að rofa til við rannsókn málsins sem er meðal þeirra sakamála sem breska lögreglan hefur eytt lengstum tíma í að rannsaka.

Í maí ákvað lögreglan að tæma grjótnámu, sem var undir vatni, nærri Inverness til að leita vísbendinga. Nú hefur um 13 milljónum lítra af vatni verið dælt úr námunni og segist lögreglan fullviss að í henni sé „afgerandi sönnunargagn“.

Brian Geddes, sem stýrir rannsókninni, segir að lögreglan muni ekki yfirgefa grjótnámuna fyrr en hver fersentimetri hefur verið rannsakaður.

Fjölskylda Renee hefur látið hafa eftir sér að hún vonist til að einhver svör fáist um afdrif þeirra mæðginanna.