Rússneska pókerstjarnan Lilya Novikova fannst látin á heimili sínu í Moskvu í vikunni. Novikova var aðeins 26 ára en hún hafði vakið mikla athygli fyrir pókermyndbönd sem hún birti á streymisþjónustunni Twitch.

Grunur leikur á að Lilya hafi verið að þurrka á sér hárið með hárþurrku meðan hún lá ofan í baðkari fullu af vatni. Talið er að Lilya hafi fengið raflost með fyrrgreindum afleiðingum.

Foreldrar hennar höfðu reynt að ná í hana í nokkrar klukkustundir en án árangurs. Það var ekki fyrr en nágranni fór inn í íbúð hennar að lík hennar fannst.

Lilya var þekkt í pókerheiminum á Twitch undir nafninu Liya5. Hennar var minnst á pókersíðunni PokerStrategy.com í vikunni þar sem meðal annars kom fram að andlát hennar væri áfall fyrir pókersamfélagið.