Þegar Kathleen Flynn, 11 ára, losnaði loks úr skóla síðdegis þann 23. september 1986 kvaddi hún vini sína og hélt út á stíginn sem hún var vön að ganga til og frá skóla. Eftir það sást hún ekki á lífi. Hún bjó í Connecticut í Bandaríkjunum.

Móðir hennar varð fljótlega óróleg og hafði samband við lögregluna. Umfangsmikil leit hófst og 12 klukkustundum síðar fannst lík Kathleen í skógi ekki fjarri stígnum. CNN skýrir frá þessu.

Rannsókn leiddi í ljós að Kathleen hafði verið beitt kynferðislegu ofbeldi áður en hún var kyrkt.

Rannsókn lögreglunnar var viðamikil en skilaði engum árangri fyrr en nú. Í síðustu viku birtust sérsveitarmenn ríkislögreglunnar í Maine við hús í bænum Stetson í Maine. Þegar íbúi hússins, Marc Karun, kom út klukkan 11.20 var hann handtekinn en hann er grunaður um að hafa myrt Kathleen fyrir 32 árum.

Í kjölfar handtökunnar sendi fjölskylda Kathleen frá sér tilkynningu í gegnum lögregluna. Þar þakkar fjölskyldan lögreglunni fyrir að hafa fundið morðingja Kathleen. Segir hún einnig að málið sé fjölskyldunni enn mjög erfitt og vilji hún ekki tjá sig frekar um það.

Lögreglan hefur ekki enn skýrt frá hvað kom henni á spor Karun en fyrir þremur árum sagði talsmaður lögreglunnar að vonast væri til að ný DNA-tækni gæti orðið til þess að leysa málið.