Í tísti frá Polar Portal rannsóknarstofnunnin segir að þetta sé óvenjuleg bráðnun svona snemma tímabilsins en þó sé þetta ekki í fyrsta sinn sem svona lagað hefur gerst. Bráðnunin varð vegna nokkurra þátta sem allir eiga sinn þátt í að gera aðstæður fyrir ís verri. Bráðnunartíminn á Grænlandi er frá júní og fram í ágúst en mesta bráðnunin á sér stað í júlí og því vekur þessi mikla bráðnun nú í júni mikla athygli.
CNN hefur eftir Thomas Mote, sem rannsakar loftslag á Grænlandi, að stöðunni nú megi líkja við það sem var í júní 2012 en það ár var metár varðandi bráðnun. Þessi mikla bráðnun núna skapar skilyrði fyrir enn meiri bráðnun er líður á sumarið því ísinn sem eftir er veikari en ella segir Mote.
Miðað við niðurstöður rannsóknar, sem voru birtar í vísindaritinu Proceedings of the National Academy of Sciences fyrr á árinu þá fjórfaldaðist bráðnun Grænlandsjökuls frá 2003 til 2013.