Danska lögreglan hefur sett sérstakan rannsóknarhóp á laggirnar til að rannsaka þrjá dularfulla eldsvoða og andlát þriggja eldri manna í tengslum við þá. Ekki er talið útilokað að sami aðili eða aðilar hafi verið að verki í öllum málunum.

Nýjasta málið er frá því á sunnudaginn en þá fannst lík í brunnu húsi í Vemmelev, sem er suðvestan við Slagelse. Ljóst er að viðkomandi var myrtur áður en kveikt var í húsinu. Endanleg kennsl hafa ekki verið borin á líkið en líklegt má teljast að það sé af húsráðandanum, 80 ára karlmanni, en hans er saknað.

Þann 14. febrúar fannst 65 ára karlmaður myrtur í brunarústum húss í Gevningen í Odsherred. Hann hafði verið beittur miklu og grófu ofbeldi áður en hann var myrtur.

Þann 21. apríl brann hús 68 ára karlmanns, sem var þekktur myntsafnari, í Ruds Vedby. Lík húsráðanda fannst síðar í malarnámu nærri Slagelse.

Lögreglunni hefur lítið orðið ágengt við rannsóknir málanna og hefur því sett sérstakan rannsóknarhóp á laggirnar. Í dönskum fjölmiðlum hefur komið fram að hugsanlega hafi sami bíllinn sést við öll húsin en það hefur ekki fengist staðfest hjá lögreglunni. Nú er verið að yfirheyra vitni og hefur lögreglan óskað eftir upplýsingum frá almenningi sem geta orðið til þess að hægt verði að leysa málin.