Hvað kom fyrir flug MH370 frá Malaysia Airlines sem hvarf með manni og mús í mars 2014 á leið frá Kuala Lumpur til Peking? Um borð voru 239 manns. Hvarf vélarinnar er ein stærsta ráðgáta flugsögunnar. Í fyrra komst sú kenning á kreik að það hafi verið flugstjórinn, Zaharie Amad Shah, sem hafi viljandi látið vélina hrapa í sjóinn. Samkvæmt kenningunni slökkti hann á staðsetningarbúnaði vélarinnar, setti á sig súrefnisgrímu og gerði þrýstibúnað í farþegarýminu óvirkan svo allir misstu meðvitund.

Samkvæmt umfjöllun The Atlantic hefur þessi kenning fengið nýjan byr undir vængi að undanförnu og fleiri hafa tjáð sig um hana. Í umfjöllun The Atlantic kemur fram að Shah hafi verið einmana og samband hans við eiginkonuna, sem var flutt frá honum, hafi verið slæmt.

Vinir og kunningjar Shah segja að hann hafi verið búinn að klippa á allt sem tengdist fyrra lífi sínu. Hann átti í ástarsambandi við aðra konu, sem var gift, og var auk þess heltekinn af fyrirsætum á samfélagsmiðlum og skrifaði oft athugasemdir á síður þeirra.

Haft er eftir nánum vini hans að hann gæti hafa blekkt flugmanninn, sem var mun reynsluminni, til að yfirgefa stjórnklefann og hafi síðan læst dyrunum og síðan flogið vélinni einn um hríð áður en hann lét hana hrapa í sjóinn.