Fimm einstaklingar á unglingsaldri hafa verið ákærðir fyrir morð á ungri konu í Alaska-fylki í Bandaríkjunum. Það gerist í kjölfar þess að ókunnugur netverji, sem sagðist vera milljónamæringur, sannfærði þau um að taka myndband af voðaverkunum í skiptum fyrir nokkurra milljóna dala greiðslu.
Hin átján ára Denali Brehmer er sökuð um að hafa skipulagt morð á „bestu vinkonu sinni“, Cynthiu Hoffman, sem fannst látin á dögunum, einungis nítján ára gömul.
Morðið virðist hafa átt sér stað eftir að maður sem kallaði sig Tyler bauðst til að borga Brehmer 9 milljónir Bandaríkjadala fyrir að taka glæpinn upp. Hún á síðan að hafa fengið jafnaldra sína til liðs við sig til að fremja verknaðinn.
Tyler, sem heitir í alvörunni Darin Schilmiller, á að hafa byrjað að skipuleggja nauðgun og morð með Brehmer nokkrum vikum fyrir morðið á Hoffman.
Þriðja júní síðastliðinn var lögreglan í Alaska látin vita að af hvarfi Hoffman, en hennar hafði þá verið saknað í eina nótt. Daginn eftir fannst lík hennar í mýri nálægt Thunderbird-fossinum í Alaskafylki.
Cynthia Hoffman hafði verið skotin í hnakkann með skammbyssu og þá hafði hún verið bundin á höndum og fótum.
Fjórum dögum eftir að lík Hoffman fannst féll grunur á Brehmer og lagði lögreglan hald á síma hennar í kjölfarið. Þar fannst barnaklám í skilaboðum á milli hennar og manns sem gekk undir nafninu Tyler sem lögregla komst að að hefði villt á sér heimildir. Síðar kom á daginn að hann heitir í raun Darin Schilmiller eins og að framan greinir og var hann með hreina sakaskrá.
Svo virðist vera að barnaklámið sem fannst í símanum hafi verið tekið upp af Brehmer. Hún viðurkenndi að hafa brotið á tveimur börnum að ósk Schilmiller, annað þeirra átta eða níu ára og hitt fimmtán ára.
Í skilaboðunum á milli Brehmer og Schilmiller á líka ýmislegt að hafa komið fram varðandi morðið á Hoffman. Til dæmis á Brehmer að hafa sagst ætla að kaupa gras áður en hún fremdi morðið og þar að auki á Schilmiller að hafa beðið hana um að halda Hoffman niðri og berja hana.
Bæði Brehmer og Schilmiller hafa verið ákærð en auk þeirra hafa einstaklingarnir sem hjálpuðu til við verknaðinn verið kærðir en það eru þau Kayden Mclintosh, Caleb Layland ásamt tveimur einstaklingum sem eru of ungir til að vera nefndir á nafn.
