Kalt loft frá Íslandi mun streyma til suðurs í vikunni og ná allt niður að Portúgal. Þetta veldur því að mjög heitt loft streymir til norðurs frá Afríku og veldur miklum hita í stórum hluta Evrópu. Politiken skýrir frá þessu. Fram kemur að þeir loftstraumar sem nú ráða ríkjum í Evrópu muni breytast þannig að loft streymi úr suðri og suðvestri upp yfir vestanverða álfuna. Það er loft allt frá norðanverðri Afríku.
Þessi hlýju loftstraumar frá Afríku munu valda miklum hitum í stórum hluta Evrópu og er meðal annars spáð allt að 40 stiga hita í Frakklandi, Þýskalandi og á Spáni. Af þessum sökum hefur franska heilbrigðisráðuneytið beðið sjúkrahús og elliheimili um að virkja viðbragðsáætlanir sínar.
Í Þýskalandi gæti hitamet, sem var sett 2015, fallið en þá mældist hitinn í Bæjaralandi 40,3 stig. The Independent segir að þýsk yfirvöld hafi gefið út leiðbeiningar til almennings vegna yfirvofandi hitabylgju. Er fólk hvatt til að drekka ekki áfengi og fylgjast sérstaklega vel með börnum og eldra fólki.