Við fyrstu sýn minnir þetta á marglyttu sem liggur á sandi. En myndin sýnir ekki marglyttu segja vísindamenn hjá bandarísku geimferðastofnuninni NASA. Þeir segja að myndin sýni risastóra leðjubólu sem barst upp frá iðrum dvergplánetunnar Ceres og upp á yfirborðið í gegnum veikan punkt á því sem innihélt mikið af salti, sem endurkastar birtu, og fraus síðan og varð að föstum massa.

MSN skýrir frá þessu. Dvergplánetan Ceres, sem er í raun mjög stór loftsteinn, er í loftsteinabelti sólkerfisins á milli Mars og Júpíters. Ceres fannst 1801 en frá 2015 hefur bandaríska geimfarið Dawn fylgst náið með dvergplánetunni. Það var við yfirferð á ljósmyndum af yfirborði Ceres sem vísindamenn uppgötvuðu „Leðjufjallið“. Það er stærsta fjallið sem hefur uppgötvast á stóru loftsteinunum í sólkerfinu okkar.

„Mannkynið hefur aldrei séð neitt þessu líkt.“

Segja vísindamenn hjá NASA og velta um leið fyrir sér hvort líf geti verið að finna á Ceres. Gögn frá Dawn benda til að lífræn efnasambönd á yfirborði Ceres innihaldi hugsanlega mikið af kolefnissamböndum. Það er eitt og sér ekki sönnun eða trygging fyrir að líf sé þar en það lofar góðu.

Ekki er vitað hvernig þessi lífrænu efnasambönd enduðu á Ceres en hugsanlega bárust þau þangað með halastjörnu sem lenti í árekstri við Ceres.

Vísindamenn hjá NASA munu halda áfram rannsóknum á Ceres til að reyna að auka vitneskju okkar og þekkingu á þessari dvergplánetu. Dawn hefur einnig svipt hulunni af óútskýranlegum ljósum blettum á yfirborði Ceres og munu vísindamenn reyna að komast að hvað veldur þeim.