Á mánudag í síðustu viku var Mackenzie Lueck, 23 ára, viðstödd útför ömmu sinnar. Að henni lokinni fór hún með áætlunarflugvél heim til sín í Salt Lake City í Utah í Bandaríkjunum. Þegar þangað var komið settist hún upp í bíl og síðan hefur ekkert til hennar spurst.

Lögreglan segir að hún hafi pantað bíl í gegnum fyrirtæki sem heitir Lyft og hafi verið ekið að þeim stað sem hún bað um en hann er í um 20 mínútna akstursfjarlægð frá heimili hennar. Þar fór hún út og hvarf. Bílstjórinn hélt strax til annarra verkefna og er ekki grunaður í málinu.

Lögreglan segir að hún hafi ekkert í höndunum sem bendi til að eitthvað glæpsamlegt hafi átt sér stað en leit stendur yfir að Lueck. Lögreglan segist hafa áhyggjur af henni og hvað gæti hafa komið fyrir hana og það sama á við um ættingja hennar og vini.

Hún átti að þreyta próf í Utah háskóla í síðustu viku en mætti ekki í það. Slökkt er á farsíma hennar og kötturinn hennar var einn í íbúð hennar. Vinir hennar segja þetta mjög ólíkt henni því þeir hafi venjulega átt í daglegum samskiptum við hana.