Leit stendur nú yfir að tveggja ára dreng sem virðist hafa horfið sporlaust af heimili sínu í Hampton í Virginíu í Bandaríkjunum.

Málið þykir allt hið dularfyllsta. Í frétt ABC11 kemur fram að móðirin hafi komið drengnum, Noah Tomlin, í rúmið að kvöldi sunnudags. Tíu tímum síðar, þegar móðirin fór inn í herbergi hans að huga að honum, var hann horfinn.

Reginald Williams, fulltrúi lögreglu, segir að lögregla reyni nú að átta sig á málinu og hvað nákvæmlega gerðist. Hann segist ekki útiloka neitt; þannig sé skoðað hvort drengurinn hafi verið numinn á brott eða hann vaknað og villst út af heimilinu.

Lögregla hefur biðlað til íbúa á svæðinu að hafa augun hjá sér. Leit í nágrenni við heimilið hefur engan árangur borið.