Danska lögreglan handtók í gær 31 í stórri aðgerð sem beindist gegn skipulagðri glæpastarfsemi. Málið hefur verið í rannsókn um langa hríð í samvinnu við Evrópulögregluna Europol og lögreglu í Svíþjóð, Hollandi, Belgíu, Slóveníu, Albaníu og Þýskalandi. Málið snýst um innflutning á einu og hálfu tonni af kókaíni og heróíni til Danmerkur.
Flestir hinna handteknu eru útlendingar. Rannsóknin beinist að skipulögðu glæpagengi sem á rætur að rekja til Albaníu. Gengið er grunað um að hafa flutt um 1.650 kíló af kókaíni og heróíni til Danmerkur. Mikið magn fíkniefna, vopna og reiðufés var haldlagt í aðgerðinni.