Þegar Mark Buede var að sendast með pizzur fyrir Papa John í Lexington í Kentucky í Bandaríkjunum í nóvember á síðasta ári var hann sendur með pizzu á mótel. Þegar hann knúði dyra kom maður til dyra til að taka við pizzunni. En Buede var athugull og brást hárrétt við því sem hann sá inn um dyrnar.

„Lítil, nakin stúlka lá á rúminu fyrir aftan hann.“

Hefur Kentucky.com eftir honum. Faith Buede, dóttir Mark, var með honum í bílnum þegar hann fór með pizzuna á mótelið en hún var á leið heim úr vinnu hjá Papa John. Það var einmitt hún sem hafði tekið við pöntuninni.

„Ég fór inn í bílinn og sagði: „Þetta var eitthvað skrýtið.““

Sagði Mark.

Feðginin ákváðu að hringja í neyðarlínuna vegna þessa.

„Ég vissi ekki hvað var í gangi en ég vissi bara að eitthvað var að.“

Þrír lögreglumenn voru sendir á vettvang. Þegar þeir knúðu dyra heyrðu þeir stúlku öskra. Þeir fóru inn í herbergið og fundu þar tvær ungar stúlku sem földu sig bak við rúm. Rannsókn lögreglunnar leiddi í ljós að þetta voru dætur mannsins og hafði hann beitt þær margvíslegu ofbeldi.

Mark Buede var nýlega sæmdur heiðursorðu fyrir árvekni sína.