Myndband sem sýndi Angelu Merkel, kanslara Þýskalands, hríðskjálfa þegar hún stóð við hlið Volodymyr Zelensky, forseta Úkraínu, fyrr í mánuðinum vöktu talsverða athygli. Þegar Merkel var spurð hverju sætti sagðist hún vera við góða heilsu en skjálftann mætti rekja til vökvaskorts.
Í morgun átti Merkel fund með Frank-Walter Steinmeier, forseta Þýskalands, og þegar hún stóð við hlið hans að fundi loknum sást hún aftur glíma við mikinn skjálfta. Hefur þetta vakið upp spurningar um heilsu Merkel sem er orðin 64 ára. Hafa einhverjir velt fyrir sér hvort Merkel sé með of lágan blóðsykur eða hvort vandamálin tengist skjaldkirtlinum.
Merkel reyndi að draga úr skjálftanum með því að setja handleggina saman. Þá sást aðstoðarmaður hennar bjóða henni vatnsglas sem hún afþakkaði. Mjög heitt er í veðri í Evrópu um þessar mundir en fundurinn milli Merkel og Steinmeier fór fram í Berlín í morgun. Hitastigið úti var um 19 gráður.