Daniel Hesketh, eigandi Panam Restaurant & Bar í Liverpool á Englandi, situr eftir með sárt ennið og töluvert fjárhagslegt tap eftir að rýma þurfti veitingastaðinn eftir að eldvarnarkerfi hans fór í gang. 50 gestir nýttu færið og stungu af frá ógreiddum reikningum sínum.

Í samtali við Mirror sagði Hesketh að það verði sífellt erfiðara að reka veitingastað og það síðasta sem rekstraraðilar þurfi sé að fólk stingi af frá ógreiddum reikningum sínum.

Rýma varð veitingastaðinn eftir að eldvarnarkerfi í öllum veitinga- og kaffihúsum á hafnarsvæðinu í Liverpool fóru í gang fyrir mistök.

Þetta var dýrt fyrir Hesketh en hann situr uppi með tap upp á sem svarar til um 170.000 íslenskra króna vegna málsins.

Þeir gestir sem voru svo heiðarlegir að snúa aftur á veitingastaðinn fengu afslátt af reikningum sínum og fengu ókeypis heita rétti í stað þeirra sem þeir urðu að skilja eftir.