Samkvæmt ákærunni stakk ungi maðurinn afa sinn til bana í íbúð í Brønshøj í Kaupmannahöfn með 45 hnífsstungum. Hann tók síðan spjaldtölvu, lestarkort, greiðslukort og hass með sér úr íbúð afans.
Fimm dögum áður nauðgaði maðurinn 23 ára karlmanni í Ørstedsparken í Kaupmannahöfn. Þar réðst hann á fórnarlambið ásamt öðrum manni. Sá hélt fórnarlambinu á meðan hinn ákærði nauðgaði því. Ekki hefur tekist að hafa uppi á samverkamanninum.
Maðurinn hefur setið í gæsluvarðhaldi síðan í september nema hvað hann gekk laus í smá tíma eftir að honum tókst að strjúka af stofnuninni sem hann er vistaður á.
Jótlandspósturinn segir að saksóknarar segi í ákæru að til greina komi að dæma manninn til vistunar á viðeigandi stofnun í stað fangelsis en enn er beðið eftir áliti danska réttarlæknaráðsins á andlegu ástandi mannsins.