Ertu að leita að vinnu? Ertu orðin þreytt(ur) á núverandi starfi? Finnst þér súkkulaði gott? Ef eitthvað af þessu á við um þig þá er hugsanlegt að rétta starfið bíði bara eftir þér. Adecco, sem er ráðningarskrifstofa, leitar nú að réttu manneskjunni í starf hjá Mars Incorporated, sem framleiðir meðal annars Mars, Snickers og Malteser súkkulaði.

Raunar er verið að leita að átta manns til starfa í smökkunardeild fyrirtækisins. Fólkið á að borða súkkulaði allan vinnudaginn. Manchester Evening News skýrir frá þessu. Engrar reynslu er krafist, ef þú telur þig vera með góða bragðlauka þá uppfyllir þú þau skilyrði sem sett eru.

Umsækjendur þurfa að ganga í gegnum erfitt ferli þar sem þeir eiga til dæmis að gefa ýmsum matvælum einkunn á bilinu 1 til 15 út frá því hversu sæt, bitur, sölt eða krydduð þau eru.

Þeir sem hreppa hnossið munu í upphafi fá sex mánaða þjálfun áður en þeir taka til starfa í höfuðstöðvun Mars í Slough sem er í um 20 mínútna fjarlægð, með lest, frá Paddington stöðinni í Lundúnum.

Því miður er ekki um fullt starf að ræða heldur aðeins 12 klukkustundir á viku og launin eru ekki neitt sérstaklega há eða sem svarar til um 1.700 íslenskra króna á tímann.

Umsóknarfresturinn rennur út í dag svo það verður að hafa hraðar hendur. Hér er hægt að sækja um.