Hópur sérfræðinga hjá Alþjóðaheilbrigðismálastofnuninni, WHO, telur að auknar líkur séu á að fólk fái krabbamein ef það vinnur á nóttinni í langan tíma. Það eru því fleiri ókostir en bara að eiga erfitt með tileinka sér hefðbundinn dægurryþma sem fylgja því að vinna á nóttinni.

Að mati sérfræðinga WHO þá eykur næturvinna líklega hættuna á að brjóstakrabbameini, krabbameini í blöðruhálskirtil og í þörmum. Í umfjöllun Jótlandspóstsins um málið er haft eftir Johnni Hansen, sem situr í sérfræðingaráði WHO og starfar hjá dönsku krabbameinssamtökunum, að hættan á krabbameini tengist ýmsum atriðum.

Þar skipti fjöldi næturvakta í röð hverju sinni máli sem og í hversu mörg ár fólk vinnur á nóttinni. Hann sagði að það að vinna margar næturvaktir í viku hverri í mörg ár geti tvöfaldað líkurnar á að fá krabbamein.

Vísindamenn telja að næturvinna trufli það ferli á nóttinni þegar líkaminn byggir ónæmiskerfið upp á nýjan leik, lagar frumur og hreinsar afgangsefni úr líkamanum.

En auðvitað þurfa sumir að vinna á nóttinni því það er ekki bara hægt að loka öllu og slökkva öll ljós á nóttinni. En að mati sérfræðinga er hægt að draga úr hættunni á að fólk fái krabbamein með því að láta það vinna fáar næturvaktir í röð og ekki í mörg ár.