Fjölskyldan féllst að lokum á þetta en vandinn var bara sá að það var ekki öndunarvél bróður þeirra sem þau gáfu heimild til að slökkva á. Þegar fjölskyldan var á fullu að undirbúa útför mannsins birtist hann ljóslifandi. BBC skýrir frá þessu.
Lögreglan hafði gert mistök þegar kennsl voru borin á manninn. Þegar komið var með mann illa á sig kominn á sjúkrahúsið fékk hann nafnið „John Doe“ en það nafn er þeim gefið sem deili eru ekki vituð á þegar þeir koma á sjúkrahús í Bandaríkjunum. Maðurinn var illa útileikinn en samt sem áður taldi lögreglan sig geta staðfest að hann héti Alfonso Bennet og var það álit byggt á ljósmyndum af afbrotamönnum.
Systur hans voru kallaðar á sjúkrahúsið til að bera kennsl á hann. Í fyrstu efuðust þær um að þetta væri bróðir þeirra.
„Ég spurði hvernig þau hefðu getað borið kennsl á hann. Ég þekkti hann ekki.“
Hefur BBC eftir Rosie Brooks.
Starfsfólk sjúkrahússins sagði þeim að systurnar gætu ekki borið kennsl á hann vegna áverka á andliti hans og að þær ættu erfitt með að sætta sig við stöðu mála.
En eftir að Bennett birtist sprelllifandi varð lögreglan að byrja upp á nýtt og bera kennsl á manninn á nýjan leik. Fingraför voru tekin af „John Doe“ í líkhúsinu. Þau sýndu að hér var um Elisha Brittman, 69 ára, að ræða. Þá var haft samband við fjölskyldu hans sem sagðist ekki hafa séð hann um hríð. Fjölskyldan hafði sett sig í samband við sjúkrahús og líkhús í leit að honum en án árangurs.
Fjölskyldur beggja manna hafa nú stefnt sjúkrahúsinu og borgaryfirvöldum fyrir vanrækslu og þær þjáningar sem þetta olli fjölskyldunum.
