Á næstunni kveður Mannréttindadómstóllinn í Strasbourg upp úr um hvort dönsk yfirvöld hafi brotið mannréttindi dæmds barnaníðings. Maðurinn var dæmdur til ótímabundinnar vistunar í fangelsi árið 1996 fyrir að hafa reynt að nauðga tveimur 10 ára börnum. Hann hefur setið í Herstedvester fangelsinu síðan. Fangelsismálayfirvöld hafa ítrekað neitað honum um lausn og segja hann of hættulegan til að hægt sé að sleppa honum lausum.

Ótímabundin vistun er einn þyngsti dómur sem hægt er að kveða upp samkvæmt dönskum lögum. Eins og heiti refsingarinnar ber með sér eru engin tímamörk á henni og er það í höndum yfirvalda og dómstóla að meta hvort hinn dæmdi er enn hættulegur samfélaginu og hæfur til að vera látinn laus.

Lögmaður mannsins hefur stefnt danska ríkinu fyrir Mannréttindadómstólinn því hann telur að maðurinn hafi ekki notið réttlátrar málsmeðferðar því óháðir aðilar hafi ekki lagt mat á hvort hann sé enn hættulegur. Þetta er brot gegn fimmtu grein Mannréttindasáttmála Evrópu að mati lögmannsins.

Dómstóllinn féllst á það á síðasta ári að taka málið til efnislegrar meðferðar.

Tobias Stadarfeld Jensen, lögmaður hjá Bonnez og Ziebe lögmönnum í Árósum, segist telja að maðurinn sé ekki það hættulegur að það réttlæti að halda honum enn í fangelsi. Það gangi ekki að það sé sama stofnunin sem hafi í 20 ár sagt manninn of hættulegan til að vera látinn laus. Hann eigi rétt á hlutlausu mati á því.