Sumir hafa tekið til bragðs að láta setja þrefalt gler í hús sín. Þetta er talið veita betri einangrun og þar af leiðandi minna hitatapi. En miðað við niðurstöður nýrrar danskrar rannsóknar þá er ekki svo gott að vera með þrefalt gler í gluggum því ýmsir ókostir fylgja því.

Samkvæmt niðurstöðunum er einfaldlega betra að vera með tvöfalt gler en þrefalt. Það voru vísindamenn við Álaborgarháskóla, Danska Tækniháskólann og hjá Region Hovedstaden sem stóðu að rannsókninni.

Í rannsókninni var tvöfalt gler sett í íbúðir í fjölbýlishúsi í Haderslev en í samskonar fjölbýlishús við hliðina var sett þrefalt gler. Niðurstaðan er að ekki er marktækur munur á orkunotkun á milli húsanna.

Einnig kom í ljós að þeir sem voru með þrefalt gler í gluggum urðu af ýmsum heilsufarlega bætandi áhrifum vegna glersins. Minni dagsbirta barst inn í íbúðir þeirra og þar af leiðandi fékk fólkið minna af D-vítamíni sem berst með sólarljósinu. Skortur á D-vítamíni veldur ýmsum sjúkdómum sem kosta danskt samfélag 18 milljarða danskra króna á ári eftir því sem segir í frétt Danska ríkisútvarpsins.