Þetta var ákveðið í samkomulagi fyrri ríkisstjórnar og Danska þjóðarflokksins við gerð fjárlaga fyrir þetta ár. Fjárstuðningur þessi, sem nemur 140.000 dönskum krónum, hefur verið í boði í mörg ár en nú hefur sveitarfélögunum verið gert að senda innflytjendum bréf og skýra þeim frá þessu til að reyna að freista þeirra og fá þá til að flytja úr landi.
Radikale Venstre, sem er einn stuðningsflokka nýrrar minnihlutastjórnar jafnaðarmanna, er ósáttur við þetta og vill að þetta verði ekki gert. Danska ríkisútvarpið hefur eftir Andreas Steenberg, talsmanni flokksins, að hér sé um „hreint áreiti“ að ræða. Það sé ekkert að því að bjóða flóttamönnum, sem hafa ekki verið lengi í Danmörku, upp á þetta en það sé klikkun að senda svona bréf til fólks sem hafi búið í landinu allt sitt líf.
Jafnaðarmenn tóku ekki í mál að breyta þessu þegar málið var tekið upp við stjórnarmyndunarviðræðurnar í síðasta mánuði og eru sáttir við fyrirkomulagið. Hér sé eingöngu um tilboð að ræða og enginn sé neyddur til að ganga að því.